Historie

't Waope van De Graasbörgers

Bie ein vorstendom heuërt ein waope, en de Graasbörgers bleve hie in neet achter. Mer 't make van ein ontwerp veur 't waope haet in Zöstere get veut in de aerd gehad. Det kaom veural door de discussie euver waat noe waal en neet op 't waope mós kómme. Metjeu van Thoar (Van Thoor), dae ein sjteinhouwersbedrief heij aan de Riekswaeg Zuid, kreeg de opdrach 't waope te make. Op 't waope sjteit in 't midde van 't sjildj de graasboer, dae mit ein zeis 't graas aan 't mejje is. Ouch sjtaon d'r twee vögel op: ein zit op de sjörskar, d'n angere in 't graas. Dees vögel zeen twee "kaatsje" (kauwe), eine vogel dae väöl veurkump op de hei. In de volksmóndj sjpruk me van heikaatsje. Dees heikaatsje sjtaon veur de bandj mit de buurtsjap De Hei.

Op 't waope sjtaon ouch twieë menkesbieje (darren). Eine zit op de lènker sjouwer van de graasboer, d'n angere is aan 't vlege in de lóch. Ze sjtaon veur de bandj mit de buurtsjap Baakhaove, vreuger eine groep keuterboere mit biejeteelt. Lènks en rechts van 't sjildj sjtaon twieë geitebök, die sjtaon veur de bandj mit Deetere. Weer mótte d'r bie zègke det de vastelaovesvereniging de Lollige Bök in Deetere ein jaor eder opgerich woort es die in Zöstere. Baove in 't waope is 't de nar dae ein uigske in 't zeil hilt.

Bron: Peter Eberson, Luc Janssen, Jos Wackers en Sjaak Gigase, Blauw is oos blood, 5x11 jaar C.V. de Graasbörgers (2002).