Graasboerin Désirée I

Allerleefste Graasboere en Graasboerinne,

Eindelijk, eindelijk, hie sjtaon ich dan! Ontzettend greuëtsj dat dees ieër mich ten deil vilt, 17e Graasboerin in 't Graasboerriek en verieërt dat ich Mandy en al die anger maedjes in dit riejke moog opvolge! Noait gedach dat 't mich zoe euverkomme. Dit is eine druim dae hie noe oetkump: ich bèn Graasboerin 2020!

Nao 't ieëste tillefoontje van Hans veurig jaor op Curaçao en de offisjele vraog van Herman en Hans een paar waeke later, volgde eine sjpannende en drökke tied. Ich höb aafgetèld... 219 daag tot aan vandaag om precies te zeen. Ich woor door t dölle haer en höb de vastelaovesaafsjpeellies al ein hauf jaor op repeat sjtaon.

Wat woor 't veurige waek sjpannend. Mèr wie dao inèns Prins Mike I sjtóng, wòs ich 't zeker: laot òs mèr sjuve, want hie geit 't krake. Same mòtte weer noch efkes oetkieke nao ósse Jeugprins of -prinses. Ich bèn benuujd en kèn neet mieër wachte om mit zien drieë aan dit geweldige sezoen te beginne. Noe sjtaon ich hie noch same mit Jeugprinses Frederique en ich vènj 't sjtiekem auch waal heel erg sjiek om same ein waek te kènne belaeve.

't Is alweer bekans 48 jaor geleeje dat ich gebaore bèn es auwtste dochter van Lei en Lia en same mit Yvonne bèn ich op de Molenlaan opgegreuïjt. Nao de Majoor Evanssjoal bèn ich in Zitterd nao 't Serviam en de HEAO gegange. Veur mien studie höb ich in Engelandj gewoond. Daonao bèn ich in Amsterdam gaon sjtudere en kaom ich in Almere terèch, wo ich mien ieëste vaste baan höb gevonje. Oeteindelik weer nao 't Zuuje bie pap en mam trök gekòmme en nao get tösjesjtops oppe Nuujsjtadt en de Hei woon ich noe alweer jaore in Auwt Zöstere, onger de rauk van de Basiliek. Ich woon in de allersjoanste sjtraot van 't dörp, de Salvatorstjraot, dao wo weer dit jaor auch de Prins in de sjtraot höbbe.

Al mieër dan 10 jaor wirk ich veur ein prachtig internationaal familiebedrief mit de wortels in mien Limburgs landj. Ieërs bie Hago en sinds ein hauf jaor bie de moder zelf: Vebego. Es assistent van de Raod van Besjtuur moog ich d'r same mit mien team veur zörge, dat op en rondjom Kesjtieël Cortenbach in Voerendaal alles op rölkes löp. Jao hieëre van de Raod... ich bèn dus waal gèt gewent!

In miene vrieje tied gaon ich regelmaotig nao de sjportsjoal en kroep ich sinds veurig jaor bie good waer op de renfits. Meziek is belangriek veur mich. Ich höb meziekles en gaon gaer nao concerte. Vreuger woor ich jaore bie De Stiftzangers mèr noe beperk ich 't zènge veural tot de momente wo op neemes mich heuërt. Ich reis gaer en bèn dan vaak onger water te vènje. Bie de Heiligdomsvaart bèn ich actief achter de sjèrme en oppe bühn sjtaon ich tösje 't volk. Sinds ein paar jaor bèn ich jurylid bie de Zösterse sjlagerverkeezing. En ich geneet volop van alle dènger die ich ongernum same mit mien clubke vrunj tot de allerleste runj. Zeker rondj de Vastelaovend hub ich väöl sjpass mit Trio Noait Genoch. Goud zeen die momente veur mich.

Gaer wil ich jederein bedanke dae op wat veur meneer dan auch d'r veur haet gezörg dat ich vandaag hie zoa sjtaon; kleid, klompe, kapsel, en mieër… 't zeen te veul luuj om allemaol op te neume, mer bedank! Hans en Herman, ich höb 't uch de letste maonje al dèkker gezag: Bedank dat geer aan mich gedach höb en dat ich Graasboerin 2020 moog zeen. Kitty, bedank veur alle raod daes doe mich same mit de manne aan de keuketaofel höbs gegaeve. Bedank veur al die super sjaon daag die ich noe al höb moge belaeve. Ich höb vanaf 't ieëste moment genaote en weit zeker dat ich dat 't kommende jaor blief doon. Bedank José en Paul: wat bèn ich bliej mit uch hulp, advieze en loesterend oewar; 't plezeer mit uch in de aafgelaupe moanje woor al geweldig!

Bedank auch pap en mam, geer höb mich de vastelaovend mit de paplaepel ingegaote. Vreuger ginge weer mit de optoch mit same mit Buurt 't Heuls en weer zònge vastelaovesleedjes onger de aafwesj, auch es 't geine vastelaovestied woor. Sjoan herinneringe höb ich aan al die Vastelaovende same. Laote weer dat dit jaor noch èns euverdoon!

Dan is het noe tied om same mit uch de glazer te laote klinke op de vastelaovend, op 't laeve, op os en op jederein dae noe neet hiebie kènt zeen.

Mit eine lach op 't gezich höffe weer de glazer in de loch

Same Vastelaovend viere, daovan krieg ich noait genoch

Vastelaovend Alaaf

Zöstere Alaaf

Graasboerriek Alaaf

Graasboerinne Alaaf