Prins Mike I
Leef vastelaovesvierders,
En alle anger Zösterse lüj.
Wie geer zeet, sjtaon ich hie, gesjtief, gesjtreke en gans in 't nüj.
Mit ein paar prachtige vaere op miene hood,
en ich kèn uch zègke: 't bevilt mich noe al verègkdes good.
Ich woor neet mieër te hauwte wie 't tot mich doordrong det ich Prins in 't Graasboerriek zoe waere.
Dit wurdt ein belaevenis wo ich nog jaorelangk op kan taere.
Mien veurgengers höbbe mich dèt dèkker es èns vertèld.
Mer auch mien eige Graasboerin Elles zaet, dèt die ieër mit niks te vergelieke vilt.
Det weer dit allebei moge mitmake is bekans neet te geluive.
Ich kèn uch verzekere: det wurt weer "Graasboerechtig" fuive.
De meiste lüj zulle mich waal kènne en weite wo ich bön groatgebrach.
Want in Auwt Zöstere oppe Molenlaan, höb ich mien kènjerjaore doorgebrach.
Mit Pap, mèlkboer Marcel, broor Ralf, en Mam Marlies van Wackers oet 't zuivelhoes.
Veulde ich mich in Auwt Zöstere ummer thoes.
Ich bön dus groatgetroch "in de zuivel" zoa gezach,
Mer de accente höbbe zich in de loup der jaore ein bietje verlag.
Vreuger ging 't om vitamine en gezòndj,
Noe vlege get mieë de promiele in 't róndj.
Auch mit Elles en de jonges höb ich veur Auwt Zöstere gekaoze.
Dao kènne weer nao hartelust träöte en blaoze.
Zoawaal op mien sjuuf es auch in de cloud gaef ich duchtig gaas.
Want in De Luije Hook bön ich miene eige baas.
Es president van Zaateweg, mien hermenieke
Sjpeel ich meistal veur mien geveul ein verantwoord partieke.
Gaer wil ich uch bie deze mèlje,
Det Zaateweg zich dit sezoen alweer 2x11 jaor lieët gèlje.
En mit in juni weer ein aenjerace-competite
Wurdt oug dit, vàs en zeker, weer ein 'sjpetterende' editie.
Verkleije doon ich mich al zoa lang es ich weit,
En den de bün op, zoawie det den geit.
Maak neet oet: es Freddie Mercurie of dae van de Heiligdomsvaart, Lotharius.
Mer noe is 't dèn: es Opperste, Kwiebus, Kwastelarius.
Ongerhandj zeet geer waal 't ein en anger gewènd van mich
Want es baezemwagesjefeur-bie-de-motorclub höb ich weer ein gans anger gezich
"Breid-in-zèt-baar" bön ich bie 't 3de elleftal.
Sjtaon ich d'rin, den doon ich auch get mit de bal.
Gelökkig kèn ich Raf en Casper bewónjere
Zoawaal aan de Bèlsje kantj,
es op de voetbalveljer in ós eige landj.
Ich mót waal daodoor väöl mit de auto sjeeze
Mer zoa sjpaar ich tenminste mien geveulige achillespeze.
Tot sjlot wil ich uch op ein breefke gaeve,
Weer gaon eine onvergaetelijke tied belaeve,
Mit of zònger mómmegezich gaon weer same handj in handj,
't zal davere in 't sjmaalste sjtökske van 't landj.
Graasboere en Graasboerinne,
Gaef 'm van ketoen,
Zaateweg, mer mit fetsoen.
Alaaf