Graasboerin Loes I 2023
Leef Graasboere en Graasboerinne,
Hie sjtaon ich den, EIN DE LIK!
Es auwt jeugprinses van de Noatevraeters oppe Laak, mér noe es Graasboerin van ut Graasboerriek! Nummer 18 in de riej, mér de iëeste van die oranje.
Wie ich een jaor of 13 geleeje in Zöstere koom woone, leek mich graasboerin waere al sjiek, mér ja, es maedje van boete t durp dach ich dét mich die kans nooit gegaeve zoe waere. Niks bleek minder waor wie Herman mich op eine aovend koom polse. Zonger twiefel zag ich JAO, neet weitende det det nog HIËEL lang ging doere. Ut 1ste jaor det weer de vastelaovend aan os veurbie mooste laote goan woor al versjrikkelik, mér toen kreege weer nog ein jaor, wo geine ganse vastelaovend gevierd koos waere en wo ut klédje nog ein jaor in de kas moos blieve hange. Geböak, geknoterd… en veural nog een jaor zjwiege woor vervaelend. Neet allein veur mich, mer auch veur Roy en veur Mayke en Rianne mien beste vriendinne, die dit geheim saame mit mich de aafgelaupe 3 jaor gedrage höbbe, en auch väöl smoesjes höbbe motte verzinne toes…
Ich bön 37 jaor, gebaore oppe Laak, mér al hiëel get jaore gelökkig in Zöstere, wo ich den aug mien hart höb verlaore en noajt miëer weggaon.
Ich woon same mit auwt prins Roy Mooren en bön ein hiëel trotse mam van Floor en ein haufmam van auwt jeugprins Loe en Wies. Weer woone aan de sjlechte kantj van het ziepke in Mariaveldj.
Mien pap en mam kenne dit jaomer genog neet miëer mitmaake, mér tösje die doezend sjterre baovenaan, zeen dér vas 2 die mit dees daag mitkieke en sjtraole van gelök.
Ich wirk al 16 jaor bie Pergamijn in Zitterd, es clientbegeleider, Hie hauwt ich die men get aan het werk en zörg ich det ze mit gooi zin weer heives gaon.
Hobbies van mich zeen lekker aete en borrele mit vrunj, hiëel väöl winkele op internet, en hie en dao een festival mit pakke. Waat de vastelaovend betröf, sjlaon ich niks euver. Die daag kom ich door mit mien zaate hermeniekes Zónger Vrugvleisj en Rek t neet den sjeurt t waal, en natuurlijk de maedjes van de Sjn.APZ.
Mien saxofoon mot dus effe plaats maake veur de versjét… Mér mit alle plezeer, want waat is ut sjiek dat ich Graasboerin bön mooge waere. Al 3 jaor sjtiekem op ein wölkske…
Waat sjiek det doa PRINS KEVIN teveursjien koom veurige waek! En ich wis geliek zéker; dit kump hiëelemaol good. Weer motte nog ein waekske wachte op ooze jeugprins of prinses, mér ich weit zeker; weer gaon d'r eine vastelaovend van make om noajts miëe te vergaete.
Leef luuj, dit jaor gaeve weer 'm van ketoen, want weer höbbe allemaol get in te haole, ich höb dér in elk geval hëel väöl zin in om det saame mit uch te gaon doon!
Alaaf, det nump ós nemes (noajts miëer, mér den auch ech noajts miëer) aaf!
Graasboere Alaaf!
Zónger Vrugvleisj Alaaf!
Rek ´t neet den Sjeurt t Waal; Alaaf! Sjn.APZ Alaaf!
GRAASBOERIN LOES I