Jeugprinses Feel I 2023

Leef Graasbuurkes en Graasboerinnekes,

Kènt geer det leedje van Beppie: " ich höb gedruimp vannach, ich woor ein prinses………."?

Ich höb det ouch gedruimp.

En det woor neet allein vannach. Ich höb hieël väöl nachte gedruimp, waal 492 nachte om precies te zeen, want ongerhauf jaor geleeje vroge Petro en Herman mich om jeugprinses te waere. Ich koos het neet geluive, eine druim dae oetkoom.

Natuurlijk höb ich drek volmondig jao gezag, want jònges en maedjes, jeugprinses waere is toch get wat ich ech hieël gaer wil.

Mer toen, …………….. ich dènk in oktober 2021, kreeg ich het berich det door corona de vastelaovend neet doorging. Ich vonj het versjrikkelijk. Dao ging miene druim. Gelökkig heij Petro ein oplossing. Es ich het gedöldj koos opbrènge en miene mòndj zoa lang koos hauwte, den mog ich in 2023 jeugprinses van Zöstere zeen. Det wol ich natuurlijk drek.

Gedöldj höb ich gehad en miene mondj höb ich gehauwte, hè Feija, want ja Feija miene bestie kèn ich ech alles vertelle en doe mos toch aan eine dien ei kwiet. Same höbbe weer alles doorgesjpraoke en same zeen weer op paad gegange veur het kleid en de medalies. Det woor sjpannend en sjiek.

Dae mondj zoa lang hauwte woor bès waal lestig. Mien zusjes Noor en Juul, en mien vrindinne höb ich väöl motte veurleege. Sorry veur det, ich maak het deze vastelaovend ram good mit uch! Ouch maak ich het good mit mien handjbalteam, de D1 van Noav, want die zolle mich toch af en toe motte misse de kommende tied.

En den mien zaate hermenieke zònger vrugvleisj. Weer besjtaon dit jaor 2x11 jaor. Wer höbbe sinds veurige waek al ein geweldige Graasboerin. Ich bèn zoa benuujd wie die het venje det ze noe ouch nog ein jeugprinses derbiej höbbe. Same gaon weer dit jubileum jaor extra viere. De ieërste keffee wo wer komme, moog ich van pap ein vaat aan uch gaeve.

Helaas is der ouch get waat neet zoa leuk woor het aafgeloupe jaor. Miene opa Theo kènt dit neet in levende lijve mitmake en wat dach geer van miene opa Jan, eine echte vastelaovend vierder es auwtlid van de raod van ellef. Wat heije die dit sjiek gevonje. Die 2 drènke zich daobaove vas en zeker eine op mich en die zolle de ganse vastelaovend biej mich zeen. Opa's deze is veur uch:………………..

Zoa wie ich al zag, ich höb lang motte wachte, mer t wachte is t mieeë den waerd, want vanaovend is het den zoa wiet.

Ich bèn zoa greuëtsj det ich hiej sjtaon es uch jeugprinses Feel den ieëste.

Same mit miene geweldige prins Kevin 1, de allerleukste graasboerin Loes 1, zaate hermenie zònger vrugvleisj en veural mit uch graasbuurkes en graasboerinnekes, gaon wer der eine sjieke vastelaovend van make. Ich höb der zonne zin in!

Mien motto dees daag:

"Snap, tiktok en Be Real zeen effe neet belangriek, want

Weer viere vanaaf noe vastelaovend in het Graasboerriek".

Zöstere, Alaaf

Graasbörgers, Alaaf

Zònger vrugvleisj, Alaaf

NOAV, Alaaf