Prins Kevin I 2023
Leef vastelaovend vierend volk oet Zöstere en omsjtreke,
Dit is ut moment wo ich hieël lang nao höb oetgekeke.
Wat woor ut un ieër det de vors mich 1,5 jaor geleeje belde.
Mer wat woor ut sjpannend wie corona zich veurig jaor opnuuj meldde.
Geine prins, graasboerin, jeugdprins of -prinses in 2022.
Ut geheim bleef nog un jaor langer bie mich.
Mer mit ut pak in de kas woor ut unne vètte vastelaovend,
Sjtiekem oetkiekend nao ut jaor d'rop, zoa väölbelaovend.
En noe sjtaon ich hiej, klaor om mit uch te fieëste,
Want nao 3 jaor haef Zöstere weer unne prins, Kevin (d'n ieëste).
Oppe schoutlaan woor ich auch de ieëste van twieë,
Want pap alias d'n Martin vd Hofman van de Hei en mam, Petra van Munsters-Janssen van Sjipperskirk ginge same in zieë.
Opgegreujd mit Zösterke Kelly in Middelveldj 1.
Dich biej alle opa's en oma's, same bie-ein,
Vastelaovend is van kleins af aan aangelieërd.
Want mit mich in de buggy woort achter de sjötte van de hei gemarcheert,
Later mit de fluit in de hènj zörge veur muzikale klanke.
Of mit sjtekke hauwe op de marimba, det dingk mit die hauwte planke ,
Veur de biebehörende carnavalsaovende oppe Hei sjting ich in de riej.
Mit pap es presentator, live meziek van Braaf Lestig, acts, buutte en un groate en kènjerparodie.
Later sjloot ich mich aan bie de menkes en wiefkes van Òntsjpoard,
En veur ut ieës woort aan unne wage geverfd en gebaord.
Mit ongerhauf lènkerhènj sjting ich echter lever toe te kieke,
De technische luuj vonje ut prima det ich ut de take deeg ontwieke.
Hoagtepunte woore de zittingen, optochte laupe en same op sjtap gaon,
Zulle wer aafsjpraeke det wer det dit jaor zeker neet euver sjlaon?
Ongertösje tömmerde ich in Tilburg aan un carrière,
Iets mit media en marketing deeg ich väöl te gaere.
Ut sjrieve van unne blog veur Chapeau Magazien of es showbizzmenke bie TV Limburg,
Op det moment verdwene bie mien auwers de zurg.
Mit mien eige Buro Kontent höb ich lètste jaore bedrieve geholpe mit marketing,
Ut enige wat ich deeg woor zègge: Loester nao de klantj, dae is keuning.
Inmiddels bekans fulltime aan de sjlaag biej de gezèt,
Es enige oppe redaksie zonger journalistieke pet.
Want kieke nao data, innoveren van producten en ut bedenken van campagnes geuf mich energie,
En ut bènnehaole van elke digitale abonnee maakt mich bliej.
Genog euver werrik, euver op mien hobby's,
En zèt uch mer good vas, want det is un gooj wasjlies.
Tennisse bie TV Rosus is get wat mich in de zomer bezighilt,
Tis daorom mer good det vastelaovend in de wèntjer vilt.
Fitserenne doon ich aaf en toe,
Mer oere kieke nao groate runj zeen gein taboe.
En es organizator van Tour d'n Hook,
Heuër ich tiedes de quiz en priesoetreiking altied väöl gevlook.
Prizzentere van ut Beerkiene bie Alois is auch un tradisie,
Same mit Marco, Freek, Stan en un bietje van Toine dit jaor op nao de 14de edisie.
En whaem herinnert zich nog 'Dit is de allerallerallerallerletste?' of 'Dao kenne weer ech niks aan doon',
Enkele carnavalskrakers van Zugabe in de tied van Toon.
Same mit Robin en Remy zeen weer de grondjleggers van de V van vastelaovend,
ut onzichtbare touwsjprènge en ongepast gedraag bie De Wereld Draait Door.
Ut woor namelijk hieël raar wie Matthijs zien ongerboks verloor,
Mer w'r höbbe os op de bühne en achter de sjerme altied good geammezeerd,
En wore mit besjermvrouw Elles en tekstsjrievers Jan en Elina ummer zeer verieërd.
De kleuëre zeen noe road-gael-greun en un bietje wit,
Want der is ein club wo ich al 27 jaor biej zit.
Wo zeen de luuj van Sjportclub Zöstere?
De voetbalclub is de greun-witte draod in mien laeve,
Dao doon ich es voetballer, vriejwilliger en veurzitter alles veur gaeve.
Nao un periode in ut ieëste noe lekker mit Vrunj bie Zöstere 4,
Mer pas nao de wedstrijd gaon w'r onger leiding van Erik Derhaag te kieër.
Mit 6 punte de wèntjersjtop in, is echter neet good te kalle,
Ein troas, ich blief auch in prinsekleijer geweun voetballe.
Trots bön ich auch op alle vriejwilligers, sjponsore en besjtuursluuj,
Die zörge det d'r 24/7 gevoetbald kènt waere, elke kieër opnuuj.
Tied om aaf te runje en ut bieës oet te gaon hange,
Want net als ich zult geer nao un lekker glaeske beer verlange.
Lach, laef en höb leef,
Sjport, gaef en zjweef,
Dènk nao, ambieer en ammezeer.
Zèng, drènk en höb plezeer,
Omerm, verbènj en vriejwillig,
Den wurd dit de sjiekste vastelaovend veur dich en mich.
Gegaeve, 7 jannewarie 2023
Zöstere