Graasboerin Sylvia III
Leef Graasboere en Graasboerinne,
Nao lang wachte en sjmachte is ut noe eindelik zao wiet, hiej sjtuit uch nuuj Graasbroerin, Sylvia III. De ieëste Graasboerin van Menno en Basisjoal In 't Park. De 19e Graasboerin van Zöstere.
Wie sjpannend woort ut wie ich door Hans woort benaderd of hae mich in mei 'ns kòs belle. Tot det moment höb ich dit veur michzelf gehauwte, mèr wie hae aangoof mich te gaon belle woore vastelaovendvlinders neet mieë te hauwte. Ut gierde door mien lief. Toen toch auch mèr manleef verteld det Hans mich zoew gaon belle mit die eine vraog! Höb David mèr metein auch mit gegaeve det ich 'jao' zoe gaon zègke.
En toen det tillefoontje! Höb allein mèr lache en oeteindelik allein mèr 'jao' gezag! David, dae naeve mich zoot, zoog ich allein mèr denke: O jee, noe mot ich mien belofte woor gaon make: Es ich Graasboerin zoe waere, zoe hae mit loupe in de optoch! Sjat, waat bof ich mit zao-eine leeve wie dich, dètse miene druim leets oetkomme, ondanks dètse ut zellef hieël sjpannend vunjs en niks mit de vastelaovend höbs. Ich weit zeker, òs gezelligheidsvrunj gaon dich òngersjteune.
Ich bön ein richtig Zösters maedje! Gebaore in ut ziekehoes van Zittard, mèr daonao höbbe mien pap en mam mich mitgenomme nao mien weegske det klaor sjtong oppe Landsheerlaan. Hie bön ich graot gewoore same mit mien zöster Marjan. Pap en mam zeen gebaore in Braobantj, mèr woone al mieë es 41 jaor in Zöstere. Zie höbbe mich de Zösterse Vastelaovend mit de paplaepel mitgegaeve. Vreug heives gaon kòste die twieë neet. Auch det höbbe ze mich mitgegaeve: vreug heives gaon kump in mien woordebook neet veur. In mien jong jaore deeg ich mit de vastelaovend gaere mit aan de miniplaybackshow, dae ich same mit auwd Graasboerin Mandy I in 1997 höb mooge winne.
Wie ich 20 jaor woor vonj ich ut tiejd om mien auwerlijk hoes te verlaote. David en ich höbbe Zöstere toen ingeruuld voor Pey. Hie höbbe weer in de laop van de jaore drie sjoan maedjes mooge kriege. Wie òs jongste maedje gebaore woort kreeg ich heimwee nao mien dörp Zostere. Weer höbbe òs hoes te kaup gezat en sjnel ingetrókke in òs palieske in Zöstere. Zellef bön ich wirkzaam bie de Sjatzoekers bie BS In 't Park. Sorry collega's, de kommende tied bön ich minder besjikbaar, mèr gaon weer same eine sjoane vastelaovend belaeve.
In mien vrieje tiejd gaon ich regelmaotig mit vrunj nao ein theater, concert, hèpke aete of ein drènkske doon in de kroeg of biej vrunj thoes. Meziek dao geit mien hartje sjneller van kloppe, mien bein beginne den te wiebele, sjtilstaon lök den neet meer. Mien zangtalent is good veur onger de doesj, mèr mit de vastelaovend zing ich alles hieël hèl mit. Auwt Graasboerinne, lègk uch de oardöpkes mèr klaor. Bie mien clubje Hell genòg, träöt ich der heel get op los, dit is neet altiejd zuuver, mèr ach daorom is ut ein Zaate Hermenie.
Den mien kleid. Ich bön d'r ontzettend greuëtsj op det mien kleid is ontworpen door òs auwdste dochter Milou. Danke Milou dètse dit veur mich höbs wille doon en dètse dit al dae tied geheim höbs gehauwte. Rachel en Nele 11 maol dank det geer mich ongersjteund höb biej alle veurbereidingen. Ich woor vaak onzeker, mèr mit uch opbeurende weurdjes is auch det allemaol good gekomme. Mit 't ontwerp en de sjtoffen bön ich nao Thea Bakkes gegaon: Danke Thea veur dien gedöldj en veur ut op het lètste moment mien kleid nog get kleiner te maken.
Wie sjpannend woor ut op de Galazitting, waem weurd de nuuje prins? Miene nuuje prins. En dao sjtóng d'r, Cliff de ieëst, eine van De Verkes. Toen wis ich ut zeker, dit geit ein geweldig vastelaovendseizoen waere. Nog ein waekse geneete mit jeugdprinses Feel I en vanaaf volgende waek is 't Dreigistern kompleet.
Maedjes van Zöstere waat bön ich blie det ich noe neet mië hoof te leege taege uch, stiekem hauwt geer ut missjien waal al verwach. Ich kiek d'r nao oet om same mit uch, mien gezelligeheidsvrunjgroep en mien Zaate Hermenie Hell Genòg de vastelaovend te gaon viere.
En den es lètste, in 't Vastelaovendleech, wil ich mit uch danse, zènge,
Òs sjoane Zöstere, same de heuëgte in brènge,
Auwd en jónk, verbonje door plezeer, vastelaovend viere, kieër op kieër!
Ich bön aan de Vastelaovend verkoch,
Vastelaovend viere weer same Hell Genòg.
Basisjoal In 't Park, Alaaf!
Hell Genòg, Alaaf!
Maedjes van Zöstere, Alaaf!
Gezelligheidsvrunj, Alaaf!
Graarsboerriek, Alaaf!