Ozze nuuje jeugprins Sten I
Leef Graasboerinnekes en Graasbuurkes,
Eindelik is 't zoa wied. Lang höb ich mótte zjwiege, det koos ich trouwes baeter es pap en mam, mer noe ken ich uch vertelle:
Hie sjtuit veur uch Jeugprins Sten de ieëste!
Veur die mich neet kènne, ich bön Sten Fiddelers, 11 jaor, zoon van Kira en Luuk. Ich bön harsjtikke blie det die mich jeugprins höbbe laote waere, al höb ich mam waal ekstra leef mótte aankieke. Mer waem kent deze lach get weigere. Dank je wel mam en pap.
Ich zit in groep 8 van de basissjoal In 't Park bie juffrouw Sabrina. Dao maak ich mit miene vrunjegroep väöl plezeer. Dit jaor zal ich mit de sjoaleoptoch veur de ieëste kieër neet mit hun kènne mitloupe. Mer det hauwe ze waal kènne dènke want mit de sjoaleoptoch verkleide ich mich al es prins. Det dee ich al van kleins af aan, verkleije es prins. Van opa kreeg ich 'n mötsj, 'ne mantjel en medalies. Dae hauw ters hieël väöl.
Ze zègke deste óm prins te zeen ein gooi kóndisie mós höbbe en fit mós zeen, mer dao maak ich mich neet drök euver. Ich bön namelik bie de voetbalclub SC Zöstere en sjpeel in de JO12 (dus ich kèn Prins Cliff nog väoöl lieëre). In desember zeen weer kampioen gewore, dus weer weite waal wie ein fieëske gevierd mót waere.
Miene sèpter is nog 'ne echte, dao bön ich erg blie mit en greuëtsj op. Dae is veur de ieëste kieër gebroek in de jaore 70. Dae höb ich dit jaor gekrege van ozze gooje vrundj Hupie Peters dae ouch jeugprins is gewaes in 1985. Dankjewel Hupie!
Aan mien prinsemötsj höb ich ein bedeltje hange, 'n orchideke. Det is veur oma Nieke die dit joamer genog neet meej mit haet moge make. Ze beteikent nog hieël väöl veur mich, dus ich höb häör op dees meneer toch bie mich.
Den sjtoan ich hie noe in mien sjiek pekske en drie kieër raoje, ich bön sjus wie groate Prins Cliff ouch in Eindhoven bie Astrid gewaes. Die haet niks gezag, dus det woor ein groate verrasjing toen ich zoog en heuërde det Cliff ouch dao woor gewaes. En Astrid haet fantasties werk geleverd zoa wie geer kènt zeen. Kènne ze toch get in Eindhove. Prins Cliff en ich höbbe bliekbaar al dezelfde sjmaak, dus det geit hieëlemaol good kómme.
En den Graasboerin Sylvia. Wie dèks zoewe weer op sjoal al langs ein door zeen geloupe, in gedachte bie dees momente, zónger det weer 't vanein wiste. Vanaaf noe kènne weer eindelik alles mit ederein deile. Noe weit ich trouwes ouch veur welk fieëske ich de sjtaontaofels op sjoal oet de kelder mós haole. Waat sjiek det weer dit same moge gaon belaeve. De sjoal kènt zich vas hauwte de kómmende waeke.
Es lètste nog 'ne hartelikke dank aan Daniëlle en Petro die mich gevroag höbbe óm jeugprins te waere.
Bèste Graasboerinnekes en Graasbuurkes noe is 't zoa wied. Same mit Prins Cliff en Graasboerin Sylvia make weer d'r ein fantasties fieës van. Ich gaon veur uch allemaol en mit miene vrunjegroep 3 daag vastelaovend viere en ich kèn uch noe al zègke: Deze vastelaovend is veur ederein: Klein of groat, rech of krómp, van bènne of boete Zöstere, 't maak niks oet, mit prins Cliff en Graasboerin Sylvia brènge weer laeve in de boet.
Zöstere Alaaf