Ozze nuuje prins Cliff I

Leef Graasboere en Graasboerinne,

Hie sjtaon ich den, es jong van Houtem in 't groate Zöstere.

't Woor eine maondigaovend in Mei, ich woor jus klaor mit de louprepetie van de sjötterie en zoog op miene telefoon det Menno gebeld haw. Nao mich helop te höbbe aafgevraog waat dae noe weer moosj, toch mer truuk gebeld. Dao hinge Menno en Frank aan de lien vanoet ein of anger chique dènk in Utrech. Ich kreeg de vraog of ich graote prins van Zöstere wool waere. Ich wis neet waat mich euverkoom, eine jong van Houtem, Prins in Zöstere.

Vastelaovend zit ós in de gene, vastelaovend zit ós in 't blood zónge die men van Hoondervel ein aantal jaore geleje. Deze teks is mich op 't lief gesjreve.

Ich bèn eine kleinzoon van 't 7e prinsepaar van CV de Katers. Opa van mich woor ein mede oprichters van de Awt Prinse en oma haet jaore de sjteke, van de Awt Prinse, zelf gemaak. Zoon van Ineke Ariaans en Thei Smeets, die wie ich gebaore woort op 5 oktoaber 1993, prinsepaar wore van CV de Katers in Houtem. Zoa wie g'r in 't filmpke höb kènne zeen, sjtóng d'r ein klein prinske in eine luier op mien gebaortekaertje. Detzelfde logo koom ouch truuk wie ich, in 2005, zelf jeugprins moch waere van 't Katerriek, get wat mein breurke in 2009 haet moge euverdoon.

In 2012 lieërde ich ein aantal men van Zöstere kènne.

Neet väöl later woort de naam De Verkes gebaore, sinds dae tied ein begrip in Zöstere. Naodet Bas sjtópde mit 't organisere van 't VVV, höbbe weer es Verkes det mit ein paar man opgepak, get wo weer jaore plezeer aan belaef höbbe. Es bliek van waardering höb ich mit nog 3 man ein 'graasbuurke' moge ontvange, oet henj van Vors Frank van Naer. Wie sjoan is 't den ouch óm prins te moge zeen euver 't Graasboerriek, in 't jaor det De Verkes 1x11 jaor besjtaon!!

Aangezeen ich mieë in Zöstere en op de hei woor es thoes, höb ich in december 2018 besjlaote om nao Zöstere te verhoeze. De ieëste jaore woonde ich bie de MOBU, baove Alice Mode, aan de Reinoud van Geldersjtraot.

Wie in 2020 't hoes op de Majoor Evanslaan te koup koom, koos ich die kans neet laote ligke. Sinds februari aafgeloupe jaor woon ich dao neet mieë allein mer same mit miene partner Colin. 't Prinselik palies stjuit den ouch dit jaor weer op de Majoor Evanslaan, precies bie Oud Prins Kevin taegeneuver. Nao 1994, 1997, 2006 en 2023 dus weer ein nuuj hoofsjtök in de prinsesjtraot. Vreugs dich toch aaf of Kartoesj det leedje veur de Majoor Evanslaan gesjreve haet.

Door de waek bèn ich wirkzaam bènne Zuyderland Medisch Centrum, meistal in Haerle en aaf en toe in Zitterd. Es specialisatie bènne de Röntgen, wirk ich de ganse daag mit radioactieve sjtoffe en patiënte, op de aafdeiling Nucleaire Geneeskunde.

Óngertösje bèn ich ouch al ein aantal jaor lid van de blauwe voetbalvereniging van 't dorp, Susterse Boys, wo ich voetbal in 't twieëde.

Daonaeve höb ich nog ein groate hobby, det is lid zeen van sjötterie Sint Martinus Holtum. Ich bèn naeve buksmeister en secretaris, sinds oktoaber dit jaor geïnstalleerd es keizer, eine ganse iéer. Ich dènk den ouch det ich nog noait zoaväöl kieëre urges haer bèn gewaes, om ein pak te passe, es aafgeloupe jaor. Ich wis op ein gegaeve moment nog neet mieë veur welk pak w'r welke aovend mooste gaon. Gaon w'r nao Janfré veur 't keizersuniform of koetsje w'r nao Astrid in Eindhoven veur 't prinsepak.

De keuze óm veur ein prinsepak oet braobantj te gaon, woor mit eine vrundj oet Veldhoven gaw gemaak. En van ein sjloeting aan de achterkantj woor ich al genaeze veurdet ze mich gevraog hawwe om prins te waere. Nao ein aantal kieëre Awt Prins Kevin 't aope rögkske te höbbe toegeknuip , haw ich besjlaote om zelf oait veur ein sjloeting aan de veurkantj te gaon. Wie ich ein waek of 6 geleje weer ein appje kreeg mit de vraog óm det pak weer toe te kómme knuipe, höb ich toch mer 'ns veurzichtig gevraog of Kevin neet lever ein sjloeting aan de veurkantj haw. Tot op heden nog gein commentaar.

Sjoanawwers wiet eweg zeen den ouch ein gooj oetkóms gebleke om medalies en dergelijke te laote aankómme zónger det 't hawve dörp d'rvanaaf wis. Bietje jaomer det de medalies ieës gans Nederlandj gezeen höbbe ieër ze op 't GLS-depot wore aangekómme.

Mochte de bure zich aafgevraog höbbe worom det de tent in de tuin al vanaaf juli sjtuit. Laote sjtaon woor minder verdach es aafbraeke en noe weer opboewe. Awt op nuuj viere bie ós thoes woor den ouch de oetgelaeze gelegenheid om keulkes, lempkes en beer in hoes te haole zónger det emes zich get aafvroog.

Veur ich aafsjloet wil ich Graasboering Loes I bedanke veur 't leuke berichske aafgeloupe waek. Ich weit zeker det weer d'r same mit Jeugprinses Feel nog ein aantal sjieke daag van gaon make.

Nao maonje van zjwiege, smoesjes verzinne en vanalles regele is 't vanaovend den eindelik zoa wiet.

2024 wurt mien jaor es prins van Zöstere en ederein moog 't weite.

Keunig, Keizer, Admiraol,

Prins zeen wille w'r toch allemaol!

Zöstere Alaaf!