Ozze nuuje jeugprinses Lina I

Eindelik is ut den zaover. Hie sjtaon ich den, Jeugprinses Lina de 1e. Waat waas ut eine groate ieër toen Petro en Daniëlle mich vrooge om Jeug-prinses te waere in ut Graasboerriek. En den auch nog in dit jubileum-jaor, 7x11! Mèr waat waas ut lèstig om dit de aafgeloupe maonje ònger de patsj te hauwte. Veur de luuj die mich nog neet kènne: ich bön Lina Ben Fredj, 11 jaor auwd, dochter van Nizar en Janice en ut zusje van Dani. Boete mien kleuërrieke prinse-pak bön ich zellef auch ein kleuërrieke prinses. Wis geer det ich veur de helf Tunesisj bön, veur ein-achste deil Indisj en den veur de res Zösters blauw blood. En baove-al kom ich oet ein richtige vastelaoves-femilie. Miene opa Ger woor in 1984 groate prins van ut Graasboerriek en is vanaaf dae tied bie Auwt Prinse van Zöstere en lid van de Raod van ellef. Mien oma Netty lup al jaore mit in de optoch en is auch mit van alles bezig in ut Graasboerriek. Miene oom Gaston ging mich in 1998 veur es Jeug-prins de 1e. Auch mien leeve euver-groat-oma Juul zal trots op mich zeen en flink mit-viere vanoet de hemel. Wis geer det zie oaijts de ieëste bejaarden-prinses van Baek woor en dit zie zellefs mit heur prinsesse-kreuën-ke begrave wol waere? En den mien peettante Daan, ein van de groatste vastelaoves-vierders van ut dörp. Vastelaovend zit richtig in mien blood!Veur mien femilie van pap ziene kantj is dit waal aeve wènne, mèr ich weit zeker det zie ut geweldig vènje om vastelaovend te viere in òs sjoan Zöstere. En mien femilie in Tunesië? Die gaon ich via Facetime en filmpkes alles oetlègke euver wie weer vastelaovend viere. Ich weit zeker det zie trots zeen en det de foto van òs drie Hoaghede zellefs in Tunesië in de hoeskamers komme te hange. Zao make weer ut Graasboerriek euver de ganse waereld bekend!Naeve mien rol in de jeug-road bön ich al jaore lid van de bèste Zaate Hermenie van ut landj: Zònger Vrugvleisj. Mit de jeug-leeje höb ich al mooge preuve wie ut veult om op vastelaoves-dènsdig bie ut kenon te sjtaon. Twieë jaor geleeje gove weer dao same ein sjoan concert. Waat woor dit ein gave ervaring, jonges! Ich verheug mich om dit jubileum-jaor same uch de vastelaovend te moge viere! Boete de vastelaovend, höb ich auch nog anger groate hobbie: handjballe. Ich sjpeel bie de bèste club van ut landj: NOAV, in de D1. Same mit mien vriendinne, en onder de leiding van mien trainsters Fanny en mien mam, höbbe weer ech-waal ut allerleukste team. In de vekanties gaon ich gaere nao Sjpanje of nao mien femilie in Tunesië, mit de kerst sjtaon ich op de ski's in Ellmau, same mit nog 100 anger luuj oet Zöstere. Verder zit ich op de allerleukste basissjoal die d'r is: SBO de Horst in Ech. Ich zit dao in ut létste jaor bie meister Sven en juf Marian.Ich höb ein super leuke vrunje-groep en bön benuujt wie die mörge reagere es zie heuëre det ich jeug-prinses bön gewoore. Ich bön auch blie det ich dit jaor de sjoale-optoch weer in Zöstere moog mitloupe in plaats van Ech, wo ich altied 'Sjrekke-dek' mos roope. Ich woon in Auwt Zöstere, op ut bekènde Salvator-sjträötje, wo al hieël get Hoaghede mich zeen veurgegaon. Auch mien veurbeeld, Auwt Jeug-prinses Hannah de 1e woont hie. Ich woor za oblie det ich heur in oktoaber al mog vertèlle det ich Jeug-prinses zoe gaon waere. Zie haet mich mit väöl dènger gehòlpe, en vandaag mich auch prachtig haet opgemaak.Sorry, Sophie, det ich dit geheim zao-lang veur mich höb motte hauwte, mèr weer gaon same eine geweldige vastelaovend viere dit jaor. En sorry, ome Stephan, dich kèns dit jaor ech neet op vekansie. Mèr ich weit zeker dètste nao deze vastelaovend auch lid weurs van òs Zaate Hermenie Zònger Vrugvleisj, want eine leukere groep besjtuit d'r neet!Prins Raoul waat waas ut ein verrassing toen Hannah mich 2 waeke geleeje ut 's nachts belde om te vertèlle dètste prins woors gewoore. Det hauw ich gaar neet verwach. Veur mich kos de vastelaovend toen al neet mieë kepot. En toen de waek dao-nao. Ich hauw al hieël get name geheuërd, mèr Debby, dich als Graasboerin, hauw ich ech neet verwach. Toen mama mich de veurige wakker koom make om te vertèlle dètste Graasboerin woors gewoore, woor ich ut leefs mit gegaon nao de zaal om uch te vertèlle det ich uch nuuj Jeug-prinses zoe waere. Helaas mos ich van mama in bed blieve en nog ein waek miene mondj hauwte. Waat super gaaf om same mit uch dit jubileum 7x11 jaor te moge viere. Ich haop det geer mich mit num onger uch vleugels!Same mit jederein, jòngk en auwd, de Hoaghede en mien Zaate Hermenie Zònger Vrugvleisj, gaon weer ein geweldig jubileum-jaor viere. Mien motto: "Mit dees fel kleuëre, gaon weer ut jubileumjaor mit z'n alle opfleuëre!"Graasbuurkes en Graasboerinnekes, Alaaf! Salvatersjtraot, Alaaf! NOAV, Alaaf! Zaate Hermenie Zònger Vrugvleisj, Alaaf!