Ozze nuuje Prins Raoul I

Leef Graasboere en Graasboerinne,Wat ein jaor. Wat eine achbaan.Óngeluifelijk det ich hie moog sjtaon es jubileumprins Raoul de 1e.Dankbaar det 't mich gegund is om prins van 't sjoane Zöstere te moge waere.Mer nog mieë dankbaar det ich hie kèn sjtaon mèt alle luuj die mich leef zeen om mich haer.Maondigaovend, 15 april, eine aovend om noait te vergaete.'t Woor de aovend nao de Marathon van Rotterdam en ich haw ein telefoontje gemis van Menno. Ich dach metein: "Zoew hae ouch eine marathon wille renne en mich get vraoge wille sjtèlle?" Wie hae toen nóg èns belde, begós ich toch sjtiekem aan get anges te dènke. Sjnel opgepak en toen woort 't al gauw dudelijk woveur hae belde. Menno en Frank zaote same in Utrecht en vroge mich om jubileumprins van Zöstere te waere. Dao hoofde ich gaar neet euver nao te dènke, ich kós ze metein vertèlle det mien antjwoord "jao" woor en 't thoesfront 't dao zeker waal mèt èns zoew zeen.Wat woor 't eine sjoane tied: medailles ontwerpe, pak oetzeuke en lekker druime euver wie w'r same de vastelaovend 2025 zoewe viere.Mer toen in augustus, sjtóng de tied efkes sjtil bie os… weer kome terech in ein achbaan van ein aantal zeer moeilijke maonje. Houpelijk is de zjwaorste tied noe achter de rögk en kènne w'r same genete van dat wo w'r de ieërste periode van gedruimd höbbe. Sjus wie de Auwt Graasboerinne zènge: "Plök den daag!" Es auwdste zoon van Petro en Danielle, ouch gekènd es die van riesjoal Jeurissen, is 't vastelaovend viere mich neet vraemd. Zoawie zie dèt van hun auwers höbbe gelieërd, höbbe zie dit ouch aan mich en mien breurke Youri euvergebrach.Es kleine sjnaak trok ich de vastelaovesdaag mèt pap en mam mèt bie Hel Genòg. Wie ich 'n jaor of 9 woor, koom ich bie de jeugraod. En in 2010 höb ich es jeugdprins al èns moge preuve wie de vastelaovend in Zöstere gevierd wurd. Dit same mit prins Cyril en graasboerin Karien.Ich höb mien ganse laeve aan de gooie kantj van 't ziepke gewoond op de Ambtmanlaan, mer sinds ein paar daag bön ich verhoes nao de verkieërde, sorry, de angere kantj van 't ziepke. Dao woon ich noe same mit mien maedje Anke op de Vincentiuslaan.Mien sjoanfemilie is ouch neet vies van de vastelaovend. Zie trèkke allemaol van jónks aaf aan mèt bie Braaf Lèstig. Super dèt ich in zo'n werm nes terech bön gekómme.Ein aantal jaor geleeje höbbe w'r mit eine geweldige groep vrunj in Zöstere CV Ummer Teväöl opgerich. Wat begoosj es ein gruupke mit 15 man, is oetgegreujd tot eine groep van mieë dan 50 man. Jónges en maedjes van Ummer Teväöl, wat vènj ich 't sjiek dat ich euge ieërste prins moog zeen. Weer gaon d'r veur zörge det w'r hie same eine onvergaetelijke vastelaovend van make.Miene grootste hobby is sjporte. Al van jóngs of aan bön ich lid van sjportclub Zöstere. 't Voetballe haef de lètste maonje, door de verboewing van ós hoes, op ein lager pitje gesjtaon, mer bènnekort bön ich weer aanwezig, ich kèn neet wachte.Daonaeve doon ich gaer marathon loupe. Dit virus höb ich opgeloupe bie mien sjoanfemilie. Barcelona, Rotterdam en Eindhoven höb ich al kènne aafvinke. Mer d'r zulle nog väöl mieë volge.Neet allein in Zöstere, mer ouch in Eindhoven ligk mien hart. Hie bön ich same mit Pap en Youri bienao eder weekend in 't Philips Stadion te vènje. Net zoa es miene veurganger Cliff höb ich dan ouch mien pak in Eindhoven laote make.Genóg euver mien hobbies, ouch al veult mien werk ouch ech es eine hobby. Bie Stelvio kèn ich jedere daag opnuuj genete van 't sjporte mit de cliënte. Ouch vènj ich 't hartsjtikke leuk óm waekelijks te sjporte mèt de luuj die ein paar leaftiedsgroepe auwer zeen den mich. De gezellige borrels hueëre dao ouch bie.Genete doon ich ouch volop in de wage bie 't bedrief van pap en mam. Trots bön ich det mien breurke en ich deil oet make van dit sjoane femieliebedrief. Sjiek det ich vanaaf hie al ein aantal bekènde köp zeen die bie mich in de wage hubbe gezaete.Verder wil ich nog ein aantal luuj bedanke:Menno en Frank, bedank det ich hie moog sjtaon es jubileumprins. Pap en mam, die mich in dit sjoane pak höbbe gesjtaoke. Anke, mien leefste steun- en toeverlaot. Paul en José, die hel gewirk höbbe om ós nuuj fieëslokatie op tied aaf te kriege.Mien nicht Monique, die mien super sjoane medaille haef geteikend en óntworpe.En al mien familie en vrunj, die zónger det ze 't wiste, mètgewirk höbbe om ós hoes op tied aaf te kriege veur dees daag.Mèt mich es prins veurop,zètte w'r de vastelaovend van Zöstere oppe kop.Plök den daag en geneet keer op keer,dan make w'r same in ós sjoan dörp 't groatste plezeer! Zöstere, Alaaf!