Ozze nuuje Graasboerin Lia I
Leef luuj,
Mit de lótsj in 't muulke, biej wieze van sjpraeke zoot ich es peuterke al vastelaovesleedjes mit te kwaeke.
Wie helder wie lever, veural sjoan verkleid. Gans ónger d'n indrök van zoa väöl gekkigheid.
Waat woor 't ein fiëes mit al die bóntje kleuëre, Toen al deej ich mien bès óm dao biej te heuëre
Det lögkde gemekkelik want det zoot in mien blood, ennnnn… Euver miene luier kreeg ich ein pipo-pekske en oppe kop eine gekke hood.
Gein wónjer, want ich bön es dochter van Mariet en Math van de Kaoleboer gebaore en mien pap en mam höbbe al lang geleje hun hart aan de vastelaovend verlaore
Al eder koom Elles, mien zöster es Graasboerin oet ós nès. Geer zeet, oppe Hendriklaan doon ze veur de lol richtig hun bès.
Want auch Mike koom later bie daezelfde tak Dae droog zellefs 3 jaor de scepter aan zien prinsepak
Aan ervaringsdeskundige höb ich dus gein gebrek en ich ken uch verzekere…. Ze zeen allemaol aeve gek.
Truuk nao mien jeug… nao 't bal biej Verjans in miene pyjama. Waat houwe w'r plezeer, pas es w'r heives mooste woor 't ein bietje drama.
Meistal ginge w'r biej Thei oppe zaal nog ein denske make En nao ein tuut frit, kroope w'r biej ós "kapot wie ene hóndj" ónger 't lake.
Es opgesjaote puber kreeg ich de sjmaak pas good te pakke, det hawd geer ja gedach Óm mit weurt van Spik en Span te sjpraeke; eine richtige kampioen van de nach
En 34 jaor geleje op vastelaoves daensdig, bön ich Peter taege 't lief geloupe, geer raojd 't al, dae woor op waeg óm bónne veur ein pilske te koupe
Óm kort te gaon: van 't ein koom 't anger: En noe zeen w'r al 23 jaor hieël greuëtsj op Mattie ooze prachtige zoon, dae sjus wie ziene pap 't geweldig vungk waat ich zoal doon.
Neet allein mit vastelaovend, mer auch waat zich zoa veurduit, de res van 't jaor. Want geer sjnap: veur mien 2 manne sjtaon ich altied klaor.
Op het tennisveldj kènt geer mich regelmaotig trappere, En mit bubbelende vriendinne aan de keuketaofel kèn ich mich good amusere
Noe dènk geer misjien det haet veur de vastelaovend al, zien gans kroet versjaote. Zeet gerös, ich höb genóg reserves veur deze vastelaovend euver gelaote.
Trouwes, mien energie is nog lang neet verbrandj, want tösjedoor wirk ich mit hart en zeel ouch nog biej Zuyderland.
Wo ouch nogal get tied in geit zitte, zeker in 't vastelaovesseizoen is oos Hermenie Zaateweg; want weer gaeve 'm ummer flink van katoen.
Es w'r optraeje zeen w'r verkleid in 't paars- flèt, successe behaole w'r veurnamelik den ouch aan 't buffèt
't träöte mót ich dit jaor aan mich veurbiej laote gaon, mer Zaateweg zal dees daag, al is 't wankelend, naeve mich sjtaon.
Al woor 't de lètste tied dèk hieël sjpannend en mooste w'r hieël sjtiekem manoevrere Mattie en Peter kooste zich mit zo'n graasboerin in hoes bès amusere.
Elles, Mike, mien leef bure Audrey en Leon; ze höbbe mich allemaol gehólpe en nemes haet verklap "SORRY MAEDJES VAN DE KNAG" det ich taege Hans en Menno JAO höb gezag. De opdrach woor: zjwiege es 't graaf
en det deeje ze allemaol aeve braaf. Nog ff kort, veurdet dalik de muziek weer sjtart. D'r mót mich ieërs nog get belangrieks van 't hart.
Ofsjoan Peter geine fanatieke vastelaovesvierder mieër is, gunt d'r mich, det 3 daag houwe op die kis. Dae leuët mich raoze en doon wat ich wil.
Hae zal biej zien eige dènke, det kump waal èns sjtil. Ich vènj 't sjiek det ich noe eindelik es ech-Zösters maedje op dees buhn kóm te sjtaon. En ich raoj uch allemaol aan, laot gaon, laot gaon!!
Want deze vastelaovend in 't sjmaalste sjtökske, sjräöme w'r same in oos sjoanste pekske en rökske
En noe het allerlètste wat ich uch höb te brènge, "desse neet kèns zènge beteikent neet des se neet zols zènge"
Zöstere Alaaf Graasboere en graasboerinne Alaaf Zaateweg Alaaf