Ozze nuuje Prins Stijn I
De proklamasie van Prins Stijn I:
Leef Graasboere en Graasboerinne,
Wat ein ongeluifelijk geveul det ich noe veur uch moog sjtaon es 75ste Prins van 't Graasboerriek! Wie Frank en Menno mich in juni vurig jaor belde, veulde ich mich metein de keuning te riek! Eine druim van mich is noe oetgekomme, mit sjpanning wach ich aaf wat ich nog allemaol gaon taegekomme.
Veur de luuj die mich neet kènne, miene naam is Stijn Leurs, 28 jaor auwt en op Prinsjesdaag bön ich gebaore! Det ich oait zou gaon regere, sjtong missjien sjtiekem waal al vas, al die jaore.
Es zoon van Frits en Miny Leurs (-Hees), en auch kleinzoon van Sef Leurs, is mich de meziek mit de paplaepel ingegaeve, want bie de hermenie bön ich bekans al mien ganse laeve.
Lang geleeje bön ich begoos op klarinet, mer sjtiekem loog mien hart toch ech bie de drumband. Mit sjtekke in de henj höbbe weer es groep al beheuërlijk get sjieke dénger bereik. Auch höbbe ze al hieël get prieze aan os oetgereik.
Laterhaer höb ich michzelf toch nog de saxofoon aangelieërd. Sjus wie miene opa det deeg, gaon ich dao noe auch al get jaore op tekieër.
De vastelaovend is mich neet vraemd. Mit ein träöt of mit ein trom, d'n optoch trék ich al jaore gans mit om. Ieërs ummer mit de hermenie, mer laterhaer kwoom auch de jeugraod daobie. Al ein aantal jaor loup ich in ein oranje kleuër, want Zònger Vrugvleisj, is de zaate hermenie woor ich bie heuër. Waat sjiek det weer nog ein waek ein gans oranje dreigestirn höbbe! Ich bön greuëtsj op ozze sjieke club, geer mot weite det ich uch ech in mien hart höb.
Auch bön ich bie Nuchter Vertroch oet Beeg, nog ein zaate hermenie! Hie bön ich al vanaaf 't prille begin, es lid van t ieëste oer bie. Mit dees jónges en maedjes trékke weer déks in 't bénne- en boetelandj vol zale, mer veur mich es hoagtepunt, det woor toch ech de LVK finale! Nog ummer waere weer door de ganse provincie väöl gevraog en toevallig besjtuit dees club noe auch nog 1 kieër 11 jaor! Mit Rek 't Neet doon ich ummer aan 't LKZH mit, geer zult waal dènke, wie blif dae jong noe fit?
Fit waer ich bie Sjportclub Zöstere, woor ich toch mot zégke det miene veurgenger Raoul, dao get mieë presteerde. Zelf sjpeel ich in 't 5de elftal, woor ich ech sjpas belaef in de derde hélf mit ein versjnapering en get sjtomme kal.
In de weekende bön ich déks op fieëste te vénje, of bön ich geweuën in de keffee belandj. Meistal zeen mien vrunj van de Verkes hie bie, want auch mit hun höb ich eine hieële gooie bandj.
Woonachtig bön ich aan de "gooie" of angere kantj van 't Ziepke, same mit mien maedje Anouk op de Deeterderwaeg. Mit z'n 2e zeen weer al bekans 3 jaor ongerwaeg. Sjus wie Graasboerin Debby, is Anouk auch ein maedje oet 't Zawpenseriek. Auch tössje Maas en Kanaal vénje ze de vastelaovend erg sjiek.
Wirkzaam bön ich bie de gemeinte Zitterd-Gelaen es Wmo-consulent. Hie kom ich dagelijks bie luuj thoes om hun zörge en hulpvraoge in kaart te brènge. En auch mien wirk, doon ich erg sjoan vènje.
Mer auch 't reizen bevult mich verregkdes good, same mit Anouk, mien vrunj en mien familie, höb ich al beheuërlijk get "airmiles" in 't blood. Menig waerelddeil höb ich al gehad, mer thoeskómme in Zöstere, det veult ummer wie ein werm bad.
Langzaam aan gaon ich noe aafsjloete en gaon weer fieëste. De kommende waeke gaon weer tekieër wie de bieëste.
Sjnap uch vas, jongk en auwt, eederein heuërt erbie. Laef wie de wéndj dien jeske weijt, lach, höb leef en bön vrie. Maak plezeer en de groatste lol, de Zösterse vastelaovend is van os allemaol!
Zöstere alaaf!
Gegaeve 10 jannewari 2026